Pse “Shqipja e Maqedonisë” është e vogël?

(Shkas për këtë shkrim është opinioni i Blerina Rogova ndaj shkrimit “Shqipja e vogël e Maqedonisë” , botuar me 26 dhjetor 2013 në http://www.zeri.info/artikulli/23757/shqipja-e-vogel-e-maqedonise dhe ne disa portale tjera)

     Më duhej një kohë e relativisht e gjatë për të vendosur nëse duhet hyrë në debat me Blerinën (Blerina, Rogova – Gaxha) pas publikimit të tekstit të saj me titull “Shqipja e vogël e Maqedonisë”! Isha dhe vazhdoj të jem i dyzuar mes asaj që më duhet të pranoj se ka të drejtë në atë që thotë  dhe instinktit tim si shqiptar i Maqedonisë për komentuar faktet mbi të cilat ajo ndërton opinionin e saj për ne.

      Blerina ka shumë të drejtë kur përshkruan Shkupin, Ohrin, Mavrovën dhe Manastirin në atë mënyrë. Përveç në Shkup, thuajse asgjë shqiptare nuk ka në ato qytete e vende. Ndërsa për çudi nuk i paska rastisur të shkoj në Tetovë, Gostivar, Dibër e Strugë. Eh po Blerina, kësaj i thonë të shkosh në varreza dhe të thuash se nuk paska njëri të gjallë! 

      Nga shkrimi i saj i vetmi përfundim që logjikshëm më vjen ndër mend është se ajo paska qenë e ftuar në ndonjë dasmë në Shkup dhe se dasma qenka organizuar në ndonjë lokal me pronar maqedonas. Qenka ndjerë  keq pasi nuk ka kuptuar kamerierët maqedonas. Duket se organizatori i dasmës paska qenë nga ata shkupjanë që preferojnë të jetojnë në pjesën maqedonase të Shkupit dhe të pinë kafe në “trgovski” më arsyetimin se nuk jetojnë dot në një lagje më “fundamentalistët”.

      Gjithsesi, mbresa nga ajo dasmë nuk e arsyeton reagimin e saj, veçanërisht faktin se nuk paska “engjëj shqiptarë” në projektin “Shkupi 2014”. Që në fillim dua të them se më mirë që nuk ka. Të gjithë ato “engjëj” në gur nuk janë gjë tjetër veç se “lugetër” që të frikësojnë në mes të ditës. Nëse me këtë ke dashur të kërkosh që edhe shqiptarët të ishin të pranishëm me ndonjë copë guri aty, atëherë ke rënë drejtë e në prehrin e partisë shqiptare në pushtet. Sa për njoftim: si reagim ndaj këtij projekti, politikanët shqiptarë kërkuan që në qendër të Shkupit të vendosen edhe shqiptarë të gdhendur në gur. Kërkuan gjithandej dhe gjetën tre emra dhe ia dorëzuan qeverisë. Qeveria e pranoi dhe presim që të ato tre skulptura të shfaqen një ditë në ndonjë skutë të sheshit të Shkupit. Kështu aty do të ketë edhe tre “engjëj shqiptar” për t’i mbrojtur shqiptarët e Kosovës a Shqipërisë kur të jetë duke shkuar në Ohër ose Mavrovë për plazh ose ski dhe ku do të kenë përsëri mundësinë të komunikoj me kamerierë me ato “tata” në fund!

       Të kuptohemi! Budallallëqet e shqiptarëve të Maqedonisë nuk kanë fund. Janë në gjendje të harxhojnë dhjetëra mijëra euro për një dasmë a për një qejf dhe pastaj gjithë jetën të vuajnë për shkak të atij investimi kot. Në të njëjtën kohë as që çajnë kokën për të mirën e përbashkët, për fatin e tyre si komunitet e si komb. Mjafton t’i kenë punët mirë në shtëpi dhe as që lodhen për çka ndodh rreth tyre. E vetmja gjë me rëndësi për shqiptarët e Maqedonisë është paraja. Janë në gjendje të bëjnë çdo sakrificë vetëm për të pasur një veturë të mirë – mundësisht Golf (dhe një diplomë nga Universet i Tetovës ose ai i Shtulit – pse jo, kur nuk kërkon shumë mund e mend)! Përtej kësaj asgjë nuk është me rëndësi.

       Cilësia e shkollimit në të gjitha nivelet ka rënë në zero. Po e përsëris - zero. Të diplomuarit e universiteteve shqiptare në Maqedoni kanë problem me fjalinë e thjeshtë. Por, gjithsesi, kjo nuk u pengon të marrin një diplomë universiteti dhe më pas të kërkojnë edhe një master! Është kthyer në modë që gratë të bëhen mësuese me çdo kusht, pavarësisht nëse kanë shkollim dhe përgatitje përkatëse, ndërsa burrat me diplomë të punësohen në administratën publike, duke u bërë anëtare partie dhe krejt në fund të behën profesorë universitar. Në gjithë botën e qytetëruar ndodh që njerëz të shkencës të hidhen në politikë dhe të kontribuojnë për vendin e tyre, përderisa tek shqiptarët e Maqedonisë ndodh e kundërta. Fillimisht futen në politikë, bëjnë pak para, blejnë diplomat dhe titujt shkencor dhe bëhen profesor universitar. Numri i profesorëve të dalë nga ky kallëp është i jashtëzakonisht i madh në USHT dhe UEJL! Ndodh edhe kjo: punësohet si administrator i thjeshtë ose roje në universitet; pas katër viteve përfundon studimet në atë universitet, vazhdon me master dhe kthehet në profesor! Kjo quhet ngritje në karrierë tek ne! 

       Politika! Këtu kemi dështuar plotësisht. Jemi pa alternativë. Në pranverën e ardhshme do të kemi zgjedhje – ndoshta dy palë (presidenciale dhe parlamentare) – dhe shqiptarët e Maqedonisë kanë dy parti që nuk kanë çka të ofrojnë më. Dallimi i vetëm mes tyre janë germat në shkurtesat e emrave që kanë. (Kujdes! Të dyja kanë germën D në shkurtesë sepse pa këtë germë nuk gjen shqiptar në Maqedoni të të votoj). “Kungull e pacërkë” thoshte Qumili në një skeç të tij të vjetër! 

        Feja! Këtu ka marrë rolin primar. Si askund tjetër ndër shqiptarë.  E vetmja gjë që shteti nuk e pengon është ndërtimi i kishave dhe xhamive. Mjafton të gjesh financim dhe mund të ndërtosh ku të duash. Ku duhet e ku nuk duhet. Është kthyer në modë që dy mëhalla të një fshati të zihen për punën e hoxhës dhe ndërtojë secila nga një xhami për vete! Mundësisht xhamia të ketë dizajnin e xhamisë së Zagrebit. Po e bëre ndryshe, s’ke bërë gjë! Minarja duhet të jetë detyrimisht më e lartë se ajo e mëhallës tjetër. Me dy minare – eh kjo është arritje! Çuditërisht para për xhami gjenden kollaj. “Në filan katundin ndërtohet një xhami. Duhet të japim diçka”, është komenti që dëgjohet në jo pak familje shqiptare të Maqedoni ose tek sa bisedojnë me Skype me djemtë e tyre në Evropën Perëndimore! 

        Perla të këtilla gjen sa të duash ndër shqiptarët e Maqedonisë. Megjithatë nuk kam ndërmend të vazhdoj së numëruari. Këto që solla si shembuj janë vetëm për Blerinën që të kuptoj se bazën për ta zvogëluar shqipen e Maqedonisë e ka gabim.

         E pra, ja pse theksova që në fillim se isha në dyshim nëse duhej ose jo të shkruaj këtë koment. As ta “sulmoj” e as ta “mbroj atë shkrim! ”Fryma e shkrimit është në rregull. Reflekton realitetin e hidhur këtu në Maqedoni, por arsyet dhe faktet që merr për bazë nuk janë të qëlluara. Emra të njerëzve te suksesshëm nga këto vise ka plotë. Edhe ngjarje që mund të kujtohen. Megjithatë, Shqiptarët e Maqedonisë të ofrojnë çdo orë e ditë fakte me budallallëqet e tyre pa fund. Prandaj jemi aty ku jemi! Në tunel ku drita e shpresës për një të ardhme më të mirë nuk duket askund!

Edi, fali se nuk të kuptuan!

(Ky tekst fillimisht është botuar në www.respublica.al)

Shpërthyen të vetëshpallurit intelektualë. analistë e njohës të zhvillimeve politike mbarë shqiptare nga Maqedonia. Lexuan një deklaratë të Aldo Brumçit, apo Jozefina Topallit, por nuk dëgjuan, ose më saktë nuk e kuptuan çfarë tha Edi Rama pas takimit me Kryetarin e Republikës së Maqedonisë, Gjorge Ivanov! Me vjen turp kur mendoj se këto analiza e komente të disa shqiptarëve të Maqedonisë mund të i shkojnë në vesh Edi Ramës! Me vjen keq për injorancën e shprehur me aq zell! Një stuhi berishiane u ngrit kundër kryeministrit të ri shqiptar, i cili në fakt, në gjuhë diplomatike, me një fjali të vetme tha më shumë gjëra në favor të shqiptarëve të Maqedonisë, sa nuk ka thënë e gjithë klika berishiane në njëzet vitet e kaluara!

Folën me yrish dhe me emocione të papërmbajtshme, analistë të ndryshëm, intelektualë me cigare në dorë, mërgimtarë, gazetarë e kush jo! Thanë “Edi Rama nuk përmendi marrëveshjen e Ohrit”, duke kopjuar deklaratën e ministrit më të dobët që ka pasur një qeveri shqiptare – kuptohet, pas Flamur Nokës që është pa konkurrencë! Thane “Edi Rama barazoi pakicën maqedonase në Shqipëri me shqiptarët e Maqedonisë që janë 500, 600 e kush e di sa qindra mijë”, duke kopjuar Xhozin që nuk e do as Shkodra e vet! “Edi Rama nënçmoi UÇK-në”, folën edhe  mërgimtarët tanë nga Zvicra, të cilët kishin edhe një shoqatë të tyre atje!!!!

O burra! Qetësohuni dhe lexojeni ose dëgjojeni me vëmendje çka tha Edi Rama! Kujdes me pikat dhe presjet, se humb kuptimin fjalia pastaj! Kujdes, se Edi Rama ka një oratori shumë më të lartë se sa paraardhësit e tij, dhe ju duhet një vëmendje më e madhe për ta kuptuar! Fundi i fundit, kërkoni “përkthyes” nëse diçka ju duket e paqartë! Pastaj komentoni.

Por, çka tha Edi Rama?

Po citoj një burim të besueshëm, që besoj edhe berishianët me të thekur nuk kanë vërejtje sa i përket besueshmërisë - Top-Channel:

"Ne kemi qenë dhe mbetemi të shqetësuar për zbatimin e marrëveshjeve dhe mekanizmave të dakordsuara edhe me partnerët ndërkombëtarë, lidhur me mbarëvajtjen e bashkëjetesës mes maqedonasve dhe shqiptarëve në Maqedoni. Nga ana tjetër zoti President më shprehu shqetësimin e tij, që të këtë më shumë vëmendje dhe më shumë hapësire për pakicën maqedonase në Shqipëri dhe unë e marr këtë mesazh, jo thjesht si një detyrim të shtetit tonë ndaj çdo pakice, por edhe si shprehje të një fakti të thjeshtë, që ne nuk u kërkojmë të tjerëve, atë që ne vetë nuk jemi gjendje ta plotësojmë për të tjerët", tha Rama. (http://top-channel.tv/artikull.php?id=264025)

Nëse ka nga ju që mund të thonë se Top-Channel është një media anti berishiane, atëherë mund të kërkoni për videon e plotë në You Tube. E gjeni kollaj.

Le ta marrim me radhë këtë deklaratë të Ramës. Ai thotë: “Ne kemi qenë dhe mbetemi të shqetësuar për zbatimin e marrëveshjeve dhe mekanizmave të dakordsuara edhe me partnerët ndërkombëtarë, lidhur me mbarëvajtjen e bashkëjetesës mes maqedonasve dhe shqiptarëve në Maqedoni”. E para, çfarë kuptoni ju me shprehjen “ne kemi qenë dhe mbetemi të shqetësuar”? A nuk do të thotë kjo se ai ka pasur dhe vazhdon të ketë në fokus të vëmendjes së vet pozitën e shqiptarëve në Maqedoni! Është shumë e thjeshtë për t’u kuptuar. Është në shqip! Pastaj, çfarë nënkuptoni ju me shprehjen “për zbatimin e marrëveshjeve dhe mekanizmave të dakordsuara edhe me partnerët ndërkombëtarë”? Më thoni një marrëveshje mes shqiptarëve dhe maqedonasve me pajtimin edhe të partnerëve ndërkombëtarë. Nuk ka pse të lodheni shumë për ta gjetur! Është vetëm një e tillë: është Marrëveshja Kornizë e Ohrit! E kuptoj shqetësimin tuaj tendencioz. Nuk keni faj, ua ka larë trurin Berisha! Andaj, i thoni atij Brumçit se për fat të keq të tij, ai e paska përmendur Marrëveshjen e Ohrit! Pjesa e fundit e fjalisë së Ramës, vë theksin në raportet mes shqiptarëve dhe maqedonasve. Deri sa e thekson, do të thotë se diçka nuk shkon aty! E kuptoj se disa nga ju nuk jeni të kënaqur me këtë konkluzion të tij, sepse jeni duke fryrë barkun me faktin se keni përmbysur Marrëveshjen Kornizë të Ohrit!

Në pjesën e dytë të deklaratës së tij të cituar më lartë kryeministri Rama flet për pakicën maqedonase në Shqipëri. Por, kujdes: para se të filloj të komentoj kërkesën e Kryetarit të Maqedonisë, ka pikë. Përfundon mendimin e parë dhe fillon fjali e re, mendim i ri. Dhe ka të drejtë kur thotë se të nuk ke të drejtë morale e as politike të kërkosh diçka nga të tjerët, nëse vetë nuk e bën një gjë të tillë! Janë më pak a më shumë, pastaj, kjo është një çështje tjetër, zotërinj!

Më vjen keq kur shoh se sa shpejtë dhe pa menduar fare keni rënë në grackën e berishianëve! Era tyre ka vdekur, për fat të mirë dhe gjithçka që thonë këto ditë është vetëm inerci e kohës së kaluar! Koalicionin e Edi Ramës e votuan mbi një milionë shqiptarë. I dhanë (gati) shumicë të cilësuar! Ai ka misionin që të ndryshoj Shqipërinë, e bashkë me të edhe fatin tonë këtu në Maqedoni.

Në fund, ju siguroj se, sido që të jetë qasja e Edi Ramës ndaj Maqedonisë, ai do ju bëj të jeni krenar me shtetin amë, me Shqipërinë! Dhe sigurisht, duke njohur mirë mënyrën e bërjes së politikës, e di se Edi Rama nuk do të komentoj gjithçka u tha këto ditë komentues e gazetarë nga Maqedonia! Por, gjithsesi dua t’i bej me dije që të injoroj komentet e tilla se janë o tendencioze, o nga mosdija!

100 ditë për qytetarët - 1000 ditë për veten!

Këto ditë më shumë kryetarë komunash vendosën të flasin për gjithçka kanë bërë në 100 ditshin e parë të mandatit të tyre katërvjeçar! Dhe siç ndodh rëndom, folën për suksese dhe arritje që paraardhësit e tyre nuk mundën t’i bëjnë për katër ose tetë vite pushtet! Realizuan gjithçka që premtuan, ndërsa ato pak premtimet që eventualisht mbetën pa u realizuar, janë për faj të ish kryetarëve. Komunat me kryetarë shqiptarë, para se gjithash, Tetova, Gostivari apo Struga, si zakonisht trashëgojnë miliona euro borxhe edhe pse paraardhësit e tyre na thanë se tashme kishin shlyer miliona euro! Nuk e di kush gënjeu, ata dje, apo këta sot? Megjithatë, për qytetarët jeta vazhdon me moton “sot për nesër” dhe me shpresën se një ditë do të bëhet më mirë.

Thënë shkurt e shqip, asgjë të re nuk thanë! Edhe këta si ato të mëparshmit, përsërisin fraza që tashmë janë më se banale! Çfarë është kjo ironi që dëgjojmë se vetëm brenda 100 ditëve kanë realizuar, 70, 80 apo edhe 100% të premtimeve elektorale. Si ta kuptojmë këtë mesazh të tyre? Se janë shumë të zotët, apo se kërkesat e qytetarëve janë aq të vogla sa mund të realizohen për tre muaj? Na paskan mbuluar disa gropa nëpër rrugët e qytetit – punë që, disa punëtorë, mund ta bëjnë për dy tre ditë. Na paskan paguar pagat e mbetura – punë që bëhet me një të rënë të lapsit dhe me para publike dhe jo me paratë e xhepit të tyre. Na paskan nisur iniciativë për të pavarësuar një shkollë – punë që nuk merr më shumë se një orë për të përpiluar kërkesën!

Nejse! Do ta pranojmë si të qenë faktin se për 100 ditë realizuan pjesën dërmuese të premtimeve! Dakord! Tani, rrjedhimisht shtrohet pyetja: çfarë do të bëni në 3 vite e 9 muaj të mbetura të mandatit? Nëse i referohemi traditës, do të thotë se do angazhoheni, që kryetarit të ardhshëm të komunës që do vij pas jush, t’i leni sa më shumë borxhe, të mbushni administratën lokale me njerëz tuaj, të leni rrugët të çahen e hapen përsëri, të uzurponi çdo hapësirë për ndërtime si t’ju teket, të blini ndonjë veturë të re zyrtare se ajo e vjetra nuk ju pëlqen, të shfaqeni nëpër ceremoni dhe rituale që organizohen nga të tjerët sa për të na treguar se jeni ende gjallë dhe në krye të komunës; të kërkoni ndonjë qytet në Shqipëri ose Turqi për t’u vëllazëruar (çfarë idiotizmi ky!), të prisni në takime protokollare ambasadorë të vendeve të ndryshme që edhe ashtu nuk kanë çfarë të bëjnë tjetër në Maqedoni, veçse të bredhin qytet më qytet e fshat më fshat...

Kështu ka ndodhur me paraardhësit tuaj! Shpresoj që kjo të mos ju ndodh edhe juve! Do të doja të ndryshohet kjo frymë dhe ky perceptim që shumica e qytetarëve kanë për komunën si institucion. Ajo të jetë në shërbim të qytetarëve dhe jo vetëm një barrë më shumë për qytetarët. Duhet të bëni diçka që të ndryshoj rrjedha e ngjarjeve! Që Tetova, Gostivari, Struga të kthehen në qytete bashkëkohore, dhe jo kasaba siç janë sot! Të shtrohen rrugës sipas standardeve dhe jo  të arnohen disa gropa dhe pjesa tjetër e qyteteve mbetet e izoluar, e dërmuar e dhunuar nga pluhuri dhe plehrat! Të vendoset rregull në ndërtime dhe jo çdo kush të ndërtoj si i kujtohet sepse ka lidhje në komunë! Kur niset një projekt – t’i shkohet deri në fund (e jo si rruga e Gostivarit në Tetovë (intelektualet dhe gazetarët e quajnë “Ilindenska”)) që është harruar kur ka filluar të ndërtohet dhe akoma nuk është përfunduar. Çdo projekt të jetë i menduar mirë që të ketë jetëgjatësi dhe jo të mund të prishet sapo të vij në pushtet kryetari tjetër (si sheshi i Gostivarit që herë hapët e herë mbyllet për trafik). Në Tetovë thuajse nuk gjen një park ose një hapësirë të gjelbëruar! Vetëm beton ose pluhur e baltë! Qentë janë pjesë e zakonshme e imazheve që vijnë nga qytetet tona – merrni masa ta zgjidhni këtë problem dhe mos u mjaftoni me akuzat se qentë ua sjellin nga qytetet tjera! Hapësirat përreth kazanëve të plehrave janë kthyer në zonë të kontaminuar me rrezik të lartë për jetën! Trotuaret vazhdojnë të uzurpohen nga shitësit me ose pa dyqane! Trafiku nuk do koment!... Rregulloni këto dhe shumë probleme tjera duke filluar nga zyrat tuaja të cilët ngjajnë me do ndërtesa gri komuniste që të trishtojnë kur futesh!

Gjithsesi, Ju uroj për sukseset e 100 ditëve të para, por vazhdoj të uroj se pas jush, nuk do të kemi një kryetar të ri që vetëm pas tre muajsh do të dal të na thotë se sa borxhe ka trashëguar, sa gropa ka mbuluar dhe sa takime të rëndësishme ka realizuar!

Edi Rama në sytë e shqiptarëve të Maqedonisë – fundi i botës apo rilindja e shpresës?

Shqiptarët e Maqedonisë duket se e kanë shumë të vështirë të kuptojnë zhvillimet politike në Shqipëri. Ky konkluzion duket edhe më i vështirë për t’u gëlltitur, kur edhe disa të ashtuquajtur “analistë dhe njohës të politikës në Shqipëri” formulojnë përfundime bazuar në paragjykime dhe mosnjohje totale të rrethanave atje!

Nuk është i vogël numri i atyre që fitoren e të majtës në Shqipëri e shohin si fund i botës, si fund i Shqipërisë. Janë bërë analiza të ndryshme në përpjekje për të gjetur arsyen pse shqiptarët e Maqedonisë, dhe jo vetëm, kanë një dashuri të madhe për Berishën dhe urrejtje Partinë Socialiste dhe drejtuesit e saj – Nano, Majko apo Rama! Disa e lidhin me fenë, të tjerët me ndarjet krahinore e dialektore. Të tretët e lidhin me emrin e partisë duke aluduar në socialistët e Serbisë... por unë them se në thelb është injoranca, mosnjohja dhe keqinformimi. Si shkas për këtë shkrim kam komentet e vazhdueshme të shqiptarëve të Maqedonisë mbi zhvillimet e fundit politike në Shqipëri dhe veçanërisht komentin e bërë nga gazetari Ismail Sinani, i cili kërkon nga Rama që më shumë të interesohet për Kosovën dhe Maqedoninë se sa për Greqinë! Dhe më tragjikja: kërkon nga Rama të kërkoj falje shqiptarëve që i ka dhuruar Goran Bregoviqit “Çelësin e Tiranës”!!!!

Kjo logjikë dhe kërkesat e tilla janë normale për ne që jetojmë në Maqedoni, por mund të duket qesharake për të tjerët. Gjithsesi, duhet ta themi hapur se në thelb të urrejtjes për Ramën dhe PS-në është pikërisht, mosdija, mosnjohja,  injoranca dhe ndjenja e inferioritetit karshi Edi Ramës. E di se në rast të botimit të këtij shkrimi do të sulmohem më keq se Ministri i Jashtëm i Esat Pashë Toptanit në shfaqjen “Dy krisma në Paris”, por kjo për mua është e vërteta! Shumica e shqiptarëve të Maqedonisë nuk e kuptojnë çfarë thotë Rama. Fjalitë e tij janë “matematikë e rëndë” për ta! Dhe pasi nuk e kuptojmë, atëherë sigurisht që “ka folur greqisht dhe keq për Shqipërinë dhe shqiptarët”.

Një i njohur i im me tha: “E dua Sali Berishën se e kam dëgjuar të thotë gjera të mira për Kosovën dhe asnjëherë nuk e ka dëgjuar një gjë të tillë nga Rama”! Pra, më thoni se si mund të përkufizohet një konkluzion i këtillë, përveç se si mosdije, mos informim apo konkluzion i bazuar në fakte gjysmake dhe plotësisht emocionale.

T’i kthehemi komentit të Ismail Sinanit mbi çelësin për Goran Bregoviqit! Në këndvështrimin tim, nuk ka asgjë të keqe që Bregoviqit iu dha kjo mirënjohje. Për punën që ka bërë në fushën e muzikës edhe e meriton dhe është nderuar gjithandej nëpër botë. Shumica e shqiptarëve të Maqedonisë edhe sot e gjithë ditën dëgjojnë muzikën e tij të krijuar në kohën kur ishte lider i grupit sarajevas “Bjelo Dugme”! E dinë këngën “Kosovka” të kënduar në gjuhën shqipe! Dhe për çudi irritohen kur një kryetar bashkie në Shqipëri i ndan një çmim. Unë do ia jepja Bregoviqit edhe titullin qytetar nderi, me arsyetimin e vetëm se në kohën kur të gjithë i shihnin shqiptarët si njerëz pa vlerë dhe të dëmshëm e të rrezikshëm, ai morri guximin të realizoj një këngë në gjuhën shqipe. Dhe në të njëjtën kohë, po këto analistë nuk e shohin e as nuk e dëgjojnë Sali Berishën kur thotë se një Damir Fazlliq e ka mik shtëpie, se po këtij Fazlliqit dhe shokëve të tij ua ka lënë në dorë sistemin energjetik të Shqipërisë dhe Kosovës, se ky Fazlliq mund të bëj çfarë të dojë nëpër Shqipëri. Se për shkak të lidhjeve të Berishës me serbët, Kosova vazhdon të jetoj “dy ore me drita, katër pa to”! Se pikërisht ky Sali ka nënshkruar marrëveshje me Serbinë ku zotohet se nuk do të teproj  me interesimin e shtetit shqiptar për shqiptarët që jetojnë në Serbi. Se pikërisht ky Sali ishte ai që për interesa të ngushta ishte gati t’ia dhuronte edhe Sarandën, jo vetëm detin, Greqisë!

Sa i përket komentit të tij për raportet me Greqinë nuk dua të bëj asnjë vlerësim, pasi nga sa thash më lartë, duket qartë kush ka ushqyer më shumë “dashuri” për Greqinë!

Çdonjëri që ndjek sadopak zhvillimet në Shqipëri e di se ishte pikërisht Partia Socialiste e cila e kundërshtoi dhënien e detit Greqisë. Ishin pikërisht deputetët e Partisë Socialiste që denoncuan të gjitha aferat e bandës se Saliut me serbet e Fazlliqit! Dhe në bazë të kësaj, si mundet Rama të trajtohet si pro-grek e Saliu si patriot?! Dhe jo pak herë më ka ndodhur që kur u them fakte të këtilla, më përgjigjen duke më thënë se të dy nuk bëjnë! Dhe të futësh dy gjera të kundërta në një thes, vetëm se nuk ta do ta pranosh të vërtetën, është shkalla më e lartë e injorancës!

Për mua patriot më i madh është ai që do të mundësoj që shqiptarët të jetojnë më mirë! Të ndërtosh rrugë e tunele nuk do të thotë patriotizëm, se nuk i ndërtoi Berisha ato objekte me paratë e tij. Enver Hoxha ndërtoi shumë më shumë objekte infrastrukturore dhe shumica e tyre janë ende në shërbim të shqiptarëve (hidrocentralet për shembull), por vazhdon të sulmohet, ndërsa Berisha më një rrugë kombi, që shqiptarët do e paguajnë sa s’bën, mbetet patriot. Kështu funksionon logjika e vëllezërve të mi shqiptarë të Maqedonisë dhe analistëve të tyre! Për fat të keq!

Gjithsesi, ndryshimi i madh i pritshëm në Shqipëri sigurisht se do të ndikoj në ndryshimin e bindjes që shumica e shqiptarëve në Maqedoni kanë për Partinë Socialiste dhe Edi Ramën. Sot Edi Rama është shpresa jo vetëm për Shqipërinë, por edhe për gjithë shqiptarët kudo që janë! Pres që kjo valë ndryshimi ta përfshij edhe Kosovën edhe Maqedoninë! Në këto 22 vite “demokraci” çështja shqiptare në Ballkan ka avancuar dukshëm: Kosova u pavarësua, Shqipëria u bë pjesë e NATO-s, Maqedonia ndryshoi kushtetutën, por shqiptarët nga ana tjetër u nënçmuan, përbuzën, varfëruan, u detyruan të mohojnë veten dhe vendin e tyre, pikërisht nën udhëheqjen e atyre qe e ishin në krye kur Shqipëria u bë anëtare e NATO-s, kur Kosova u pavarësua dhe shqiptarët e Maqedonisë fituan Marrëveshjen e Ohrit! Prandaj këtë fitore e socialistëve në Shqipëri e shoh si një ogur se gjërat duhet dhe do të ndryshojnë edhe tek ne.

Edi Rama ka mbi shpatulla detyrën e madhe për të rilindur shpresën te shqiptarët. Do ta ketë të vështire pasi më këtë fitore ka mundur gjysmën e të keqes (Berishën), sepse pjesën tjetër të keqes e ka me vete (Metën)! Besoj se ai është i vetëdijshëm për këtë. Por, ne nuk na mbetet gjë tjetër që, pasi ia dhamë shansin, t’i urojmë sukses dhe ta ndihmojmë! Ndryshe, nuk do ta lëmë të qëndroj gjatë në pushtet. Tani e dimë formulën e rrëzimit të atyre që nuk mbajnë premtimet!

Në fund, jam i bindur se Rama kryeministër do të jetë i mirëpritur sa herë që do të vendos të vij në Maqedoni. Jam i bindur se ai ka të gjitha mundësitë që kur të vij tek ne, të na jap zemër dhe të na bej të ndjehemi krenar.